سياحة في مدينة تيزنيت

*

--==*==--

سياحة في مدينة تيزنيت

--==*==--

*

السلام نربي ف تيزنيت --==*==-- لي ڭان خ سوس تيتريت

أفولكي ن لمدون تيويت --==*==-- تزيينت ترووست تاسليت

أمزروي ندارنخ تحضيت --==*==-- تاكوست ن سوس تاقديمت

الخليفت نتكلديت تزريت --==*==-- الشان ن سوس توسيت

خ تميزار تكيت تاسعديت --==*==-- لاصل نم أس تفولكيت

كدا اومزداغ أتسرضيت --==*==-- منشك لاحكام أتسنبضيت

أسايس ن سوس أت ڭيت --==*==-- تيضاف غامان غيكليت

السور نم أس تحوديت --==*==-- لحوروم ن الدين دالنييت

تورﱡوت تيغزي تمزييت --==*==-- أتيك نم إڭوت تغليت

أورد لبنيا ن تادواريت --==*==-- ولا ايكلان نتامصريت

أولا تيملسا د تجلابيت --==*==-- د ايرڭازن أوڭلن الكميت

ديدوكان أولا تاجبيرت --==*==-- أقلمون د الرزة تومليلت

أرايخ ايمل ماد تكـتيت --==*==-- أولا ما راداخ تينيت

لمال دتسبابت دلامينت --==*==-- نقورت د وورغ ايوينت

تيزنيت أرتيني ماخ تليت --==*==-- أيا عشاق مانيس تديت

لعهد ن كراتنخ ملي ييت --==*==-- لاثر نون ايدا لاحييت

كيخد لمشوار د الزاويت --==*==-- خ تاسكاين السور تجليت

ساقسا ايفرض د تالعينت --==*==-- أولا تاركا د السينييت

أتيزنيت أنسين ما تسيكيلت --==*==-- إيزد اينموكارن ن تاقبيلت

حتا يان أوريسين لقيمت --==*==-- ايزماز دلهول لي الزرينت

مون كيس لقيود دلجميعت --==*==-- أرانت ايدليسن س لقيصت

ايرا ليستيعمار خ تيزنيت --==*==-- أستيك د تكمينس تاروميت

إيجاهد الهيبة ايبـيد كيت --==*==-- ايحرك فلاسن س النييت

منشك ن لاشياخ أتربيت --==*==-- د الطلبا ن لقرآن أتسغريت

أمارڭ مارا كيس تينيت --==*==-- تينضامين أولا تولغيت

خ واشتوكن د ايداولتيت --==*==-- ايحواشن سنكرن لعفيت

لحاج بلعيد باب نتاشيخت --==*==-- نومارڭ ايعوما الدونيت

أولا الروايس ن تاشلحيت --==*==-- د إينازورن نتامازيغت

كيكان أتيزنيت ما تفكيت --==*==-- دينمغورن ترا تمازيرت

*

--==*==--

نظم : محمد زلماضي المزالي

--==*==--

*

***